【拜拜里约】中国一金饮恨！东京再见！

 踏入里约热内卢奥运嘅第17日，除咗系最后一个比赛日之外，亦都举行咗今届奥运嘅闭幕礼。压轴之战由美国男篮同埋历史性首次跻身男子篮球决赛嘅塞尔维亚携手合演。最终美国男篮以96比66大炒塞尔维亚，连续3届拎到金牌，同时都系今届奥运最后一金！，今届奥运正式划上圆满句号。美国队最终成为大赢家，而中国队则以1金之差不敌英国，以总排名第3完结今届赛事。抱持体育精神、展望将来，下届2020年东京奥运再见！

 里奥闭幕式同意预计嘅一样，平淡又无惊喜。但去到下届东京奥运嘅「自我介绍」环节，就即刻令观众眼前一亮！喺日本代表、东京都知事小池百合子接过奥运会旗之后，会场即刻奏起日本国歌，紧接有一连串嘅表演节目，东京奥运嘅演出利用日本动漫、电玩嘅经典角色，融合日本文化特色，多啦A梦、吉蒂猫、足球小将同埋超级马里奥等亲切嘅角色悉数登场，负责「最后一棒」嘅超级马里奥，喺多啦A梦嘅法宝协助下，打开通道走入里约，当通道喺马拉简拿球场出现之后，日本首相安倍晋三仲化身为「真人版马里奥」出现喺舞台上面，真系好有创意！最后地上更有「See you in Tokyo」嘅字样出现，令人对4年后嘅东京奥运会充满期待！

美国队喺最后一个比赛日夺得2面金牌，除咗男篮击败塞尔维亚拎到3连霸之外，美国名将席儿兹亦喺女子中量级拳击项目成功卫冕夺金。佢哋喺今届奥运一直保持领先优势，最终以46金37银38铜牌，总共121面奖牌，成为今届奥运嘅大赢家。而中国队则夺得26金18银26铜，总共70面奖牌，以1金之差在金牌榜落后于英国，位列奖牌榜第3位。而英国就以27金23银17铜牌，总共67面奖牌，以「二哥」姿态完结里约奥运。

 连续三届喺奖牌榜排名「非1即2」嘅中国，喺2004年雅典奥运拎到32金，总成绩排名第2，其后喺2008年北京奥运，中国藉主场之利以51金封王，之后到2012年伦敦奥运，中国继续发挥强者本色，以38金排名第2。但嚟到今届里约奥运，中国队喺多个赛前被视为可以「包金」嘅项目，包括跳水同羽毛球等都事与愿违，加上喺体操项目「食白果」，射击亦不如人意，令到总金牌数目跌至近4届嘅新低只得26面，最终只能屈居第3，对上一次跌出首两名已经系16年前嘅事，喺2000年悉尼奥运，当时中国队不敌美国同俄罗斯只能做「三哥」。不过，相信各位运动猛将会继续努力同抱持体育精神，下届2020年东京奥运再见！